Tiramisu | تيراميسو - بارد يسرسح -

قبل كم يوم فجأه شفت كم وحده من قرايبي طايحين يقولون تيراميسو فلانة وتيراميسو فلانة!
سألتهم شسالفة هالتيراميسو؟ طاحوا لي فيه مدح وأكثر مدحة أٌقنعتي أجربه هي - بارد يسرسح - أنا بس قريتها تخيلت كمية الخفة والطعامة فيه لول 

اللي يميز الوصفة إنها سهلة ومقاديرها متوفرة! مو زي التيراميسو (الأصلي)

أتوقع كلكم متعودين تسوون التيراميسو بجبنة الماسكربوني أو الكريم تشيز
وتستخدمون فيها بسكوت الليدي فنغرز(Lady Fingers) أو أصابع الست
لكن فهالوصفة نستخدم جبن سايل، وبسكوت شاي.


تقدرون تستخدمون أي طبق أو صينية أو ممكن حتى كاسات، أنا فضلت أسويها كذا زي ما شفتها

التيراميسو عبارة عن طبقات من البسكوت المغمس بشراب القهوة، وكريمة بالجبن، ورشة الكاكاو p:

البسكوت راح نصفه بطريقة عشوائية طبقة أو طبقتين حسب رغبتكم


بس لازم نراعي لو حطينا طبقة بسكوت وحدة طبقة الكريمة اللي بعدها لازم تكون خفيفة! ولو حطينا طبقتين نسمك طبقة الكريمة وكذا
بالنسبة للكاكاو ممكن ترشون بين الطبقات وممكن لا ولا تستهينون فيه ولو إنها رشه لكن طعمها يبين ف لو ماتحبون الطعم المر لا تحطون بين الطبقات


أترككم مع الوصفة:

تيراميسو - بارد يسرسح - تكفي 8~10 أشخاص

المقادير:

(طبقة الكريمة)
- 4 أظرف دريم ويب
- كوبين أو 460مل حليب بارد
- ملعقة صغيرة فانيلا
- سكر حسب الرغبة (3-5 ملاعق كبيرة)
- علبة 170غ قشطة
- 6 ملاعق كبيرة مليانة جبن سائل بوك أو المراعي *نراعي مايكون جبن شيدر زي كرافت

(طبقة البسكوت)
- 3 أكياس بسكوت شاي أي نوع
- 3 ملاعق كبار نسكافيه
- ملعقة كبيرة ونص سكر
- كأس ونص إلى كأسين ماء فاتر

- نسكافيه وبودرة كاكاو لرش الوجه (يمكن الاستغناء عنها)
- للتزيين فراولة أو شوكولاتة مبشورة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الطريقة:

1- نحضر الكريمة: نخلط أولا الدريم ويب مع الحليب حتى تكثف الكريمة وتصبح متماسكة وراح تاخذ وقت شوي بما إن الكمية كبيرة. نضيف لها الفانيلا والسكر والقشطة والجبن ونخلطها عدل وندخلها الفريزر على ما نجهز الباقي.

2- نجهز شراب القهوة نخلط النسكافيه والسكر في الماي.

3- نبدأ أول طبقة ملعقة او ملعقتين من الكريمة نمسحها في قاعدة الصحن أو الصينية ونرشها شوية قهوة (ويفضل ترشينها بيدك بحيث تطحنينها بأصابعك وترشين) ونرشها شوية كاكاو.

4- نغمس البسكوت في القهوة (وننتبه ما نطلعه بسرعه ولا ننقعه فيها) ونصفه في القالب بشكل عشوائي.

5- نغطيه بطبقة من الكريمة سمكها حسب سمك طبقة البسكوت زي ما ذكرنا ونرجع نرشها بالكاكاو والقهوة ونكرر الطبقات حتى تنتهي الكمية وطبعاً آخر طبقة تكون كريمة.

6- نرش الطبقة الأخير بالكاكاو ونغطيها تماما ونزينها سواءاً بالشوكولاتة أو الفراولة والأفضل فراولة حتى تعطي لون.

7- ندخله الثلاجة لفترة حتى يبرد و(تتجانس) النكهات لول

وألف عافيه ♡

شاركوني رأيكم في الوصفة ولو طبقتوها لا تنسوا توروني تطبيقكم على حسابي الإنستغرام: aayness@

وشكراً ♡